Се намалува матноста на изворот Шум, водата во Струга и понатаму забранета за употреба

Се намалува матноста на изворот Шум, од каде што Струга и околните села се снабдуваат со вода, но параметрите од земените мостри во средата сè уште се со високо ниво на матност, покажуваат резултатите на Центарот за јавно здравје - Охрид.

Првите мостри земени од изворот Шум на 9 февруари, според д-р Лидија Симоноска, специјалист по хигиена и здравствена екологија во Центарот за јавно здравје - Охрид, покажале 28,56 проценти матност, а мострите од 11 февруати покажуваат матност од 10,17 отсто.

- Во градот водата секаде е со висока матност, имаше хлор, но таа здравствено не е исправна додека не се намали на максимално дозволена концентрација на матност, 1,5 отсто - информира Симоноска. 

Екипите на ЦЈЗ Охрид денеска повторно ќе земат мостри од изворот и докторката очекува намалување на матноста нагласувајќи дека деновиве нема активности на каменоломот, кој е во непосредна близина на изворот Шум.

- Се надевам дека матноста ќе биде намалена затоа што нема никакви активности над самото извориште. Над изворите има каменолом, каде што се вклучуваат динамити и нормално има лизгање на внатрешните слоеви од земјиштето. Од внатрешноста на земјиштето се има откачено некој слој и матноста е од тука, од тие вибрации, детонации и така натаму - појасни Симоноска. 

Шум, нагласи таа, е единствениот извор што може да ја обезбеди цела општина Струга, градот и селата што се приклучени на градскиот водовод. Уште еден извор има во селото Белица, но тој е само дополнување во летната сезона.

Во Секторот за внатрешни работи Охрид, како што информира портпаролот Стефан Димоски, до овој момент немало пријава и оти случајот е во предистражна постапка.

Основното јавно обвинителство Струга оформи предмет за да се испитаат причините и евентуално сторени кривични дела против животната средина и природата по енормното загадување на водата за пиење и за основните животни потреби.

Водата од струшкиот водовод од неделата е забранета за секаква употреба поради многу висока заматеност на изворот Шум и на сите мерни места во градот. 

МИА