Шест Бугари осудени на затвор во Велика Британија поради шпионажа за Русија

Шест Бугари беа осудени од суд во Лондон за шпионажа во корист на Русија, јави ДПА.

Водачот на групата, 47-годишниот Орлин Русев, кој ја водеше групата од пансион на источниот брег на Англија, денеска беше осуден на 10 години и осум месеци затвор.

Тој ги призна своите дела заедно со неговиот заменик Бисер Џамбазов (44), кој беше осуден на 10 години и два месеци, и 33-годишниот Иван Стојанов, кој доби казна од пет години.

Агентките кои дејствуваа како заводнички, 33-годишната Катрин Иванова и 30-годишната Вања Габерова и 39-годишниот пливач Тихомир Иванов Иванчев, беа прогласени за виновни во март за дејствија за кои полицијата рече дека претставуваат ризик за човечкиот живот и националната безбедност на Обединетото Кралство.

Судијата Николас Хилијард ја осуди Иванова на девет години и осум месеци затвор. Габерова е осудена на шест години, осум месеци.

Нејзиното поранешно момче Иванчев, од Актон, Западен Лондон, беше осуден на осум години затвор.

Судијата Хилијард ја пофали полицијата за нивната „исклучително темелна и фокусирана истрага“. Тој истакна дека осудените лица биле „мотивирани од пари“ и живееле „многу удобно“ со значителните суми што им биле платени.

За време на судските рочишта, стана јасно дека шпионите биле предводени од наводниот руски агент Јан Марсалек – 44-годишен австриски бизнисмен кого го бара Интерпол по банкрот на компанија. Марсалек дејствувал како посредник помеѓу руската разузнавачка служба и Русев, јави ДПА.