Словачка предлага забрана за социјални медиуми за деца под 16 години

Словачката влада одобри нацрт-закон со кој би се забранило користење социјални мрежи од деца под 16 години, нагласувајќи дека тоа ќе го спречи развојот на зависност и ќе го намали социјалниот притисок и радикализација.

Доколку биде усвоен од парламентот, законот ќе им забрани на децата да креираат сметки на социјалните мрежи и ќе бара од корисниците да ја докажат својата возраст, покажуваат документите објавени на веб-страницата на словачката влада.

Се наведува дека „предложената законска иницијатива реагира на растечката улога на онлајн технологиите и социјалните мрежи во ширењето на содржини од агресивна, екстремистичка или друга штетна природа“.

Во документот се додава дека одлуката за воведување забрана за користење на социјалните мрежи од страна на лица под 16 години се базира на истражувања во психологијата и невронауката, кои покажуваат дека адолесценцијата е клучна фаза во развојот на идентитетот, критичкото размислување, регулирањето на емоциите и социјалните односи.

Предлог-законот предлага да се воведе барање за докажување на возраста на корисникот при креирање профил на социјална мрежа без давателите на интернет услуги да добијат пристап до други лични податоци. Критериумите за верификација ќе бидат во согласност со правилата на ЕУ за дигитални услуги.

МИА