Словенија од денеска е членка на Советот за безбедност на ОН

Словенија денеска официјално го почна мандатот како непостојана членка на Советот за безбедност на ОН, кој трае до 31 декември 2025 година, а работата на прашањата за светскиот мир и безбедност практично ќе почне утре, бидејќи Палатата на народите денеска не работи поради 1 јануари.

Словенечката министерка за надворешни работи Тања Фајон на почетокот на својот мандат најави дека ова е одлична можност, но и одговорност, бидејќи и покрај глобалната поврзаност и меѓузависност, сегашната ситуација во светот е „сложена“.

– Затоа ќе вложиме посебен напор да бидеме бранители на мирот, напредокот и безбедноста, најави таа и рече дека тимот во Њујорк, кој ќе го сочинуваат триесетина луѓе, е добро подготвен и многу мотивиран и сака да остави белег.

И премиерот Роберт Голоб смета дека Словенија го почнува својот мандат во време на растечки кризи и предизвици во меѓународната заедница, поради што нејзината улога како непостојана членка е уште поважна.

Советот за безбедност на ОН е најважното тело на светската организација што одлучува за прашања од меѓународниот мир и безбедност.

Има 15 членки, од кои пет се постојани (САД, Кина, Русија, Велика Британија и Франција), а десет се избираат со мандат од две години, од кои пет се избираат секоја година од Генералното собрание на ОН.

Ова е второ членство на Словенија во Советот за безбедност, каде што беше веќе во 1998 и 1999 година, кога мисијата во ОН беше предводена од подоцнежниот претседател на републиката, Данило Турк.