Со сопствени иновации, Кина го редефинира фармацевтскиот пазар

Кина сè повеќе им парира на САД и Европа во фармацевтската индустрија, мотивирана од брзи иновации, регулаторни реформи и демографски промени кои генерираат цврст раст и важен прогрес во креирањето на нови лекови, пишува порталот Еуроазија бизнис њуз.

Во 2025 година, Кина учествува со околу 31 отсто во глобалната развојна програма на иновативни лекови, веднаш зад САД, кои имаат 35 отсто.
Кинеските компании предничат во напредни области како што се конјугати на антитела и лекови (ADC), бифункционални антитела и CAR-T терапии – „во кои повеќе од половина од клиничките производи се со кинеско потекло.“

Биотехнолошките компании од Кина веќе не се само имитатори, туку лидери во иновации, со повеќе нови кандидати за лекови годишно од ЕУ и речиси израмнети со САД.

Кинескиот фармацевтски пазар покажува брз пораст и се прогнозира да расте со просечна годишна стапка од 7,2 отсто во периодот од 2025 до 2033 година, достигнувајќи скоро 573 милијарди долари до крајот на тој период. Овој бум е охрабрен од длабоки реформи во здравствениот систем што овозможуваат подобра пристапност и ценовна достапност на лекови, како и поефикасни регулаторни процеси преку олеснети одобренија, проширување на Националната листа на рефундирани лекови (NRDL) и програми за набавки по обем.

Регулаторните реформи, кои се спроведуваат во рамките на иницијативите за 2024–2025 година, поддржуваат усогласување со глобалните стандарди, забрзано одобрување на нови лекови и зголемена транспарентност во клиничките испитувања – што креира поповолна околина за иновации, и за домашните и за странските компании. Владините политики исто така, стимулираат инвестиции во истражување и развој во клучни области како онкологија, дијабетес, кардиоваскуларни болести и биолошки терапии.

Сѐ поголемото присуство на кинески фармацевтски производи има значајно влијание врз глобалните лиценцни договори – „во 2025 се очекува речиси 40 отсто од нив да бидат поврзани со производи развиени од кинески биотех-компании, што укажува на зголемено водство во оваа сфера“, посочува Еуроазија бизнис њуз.

Оваа динамика е јасно видлива кај конкуренцијата за т.н. „блокбастер“ лекови како Keytruda (имунолошка терапија) и Ozempic (GLP-1 терапија за дијабетес и дебелина), каде што кинеските иновации и растечките домашни производствени капацитети се закана за пазарниот удел на САД и Европа. Способноста на Кина да развива и комерцијализира нови терапии во голем обем претставува сериозен предизвик за западните фармацевтски гиганти.

Генерално, со огромен и растечки домашен пазар, силна иновативна база, регулативи кои даваат поткрепа и стратешки здравствени приоритети, Кина се позиционира како сериозен конкурент што ги принудува фармацевтските лидери од САД и Европа „да се прилагодат или да влезат во партнерства за да го задржат глобалното водство.“

МИА