Сотир Лукровски: Само оние кои не ме познаваат може да поверуваат дека сум се откажал, се враќам со нова енергија

Градоначалникот на Карпош Сотир Лукровски информираше дека по одреден период на отсуство поради здравствени проблеми, повторно се враќа на своето работно место.

Тој во објава истакна дека изминатиот период за него бил сериозно животно искушение, во кое се соочил со здравствен предизвик што, како што вели, го натерал да сфати дека вистинската сила е во тоа човек да се исправи по падовите.

„Со голема благодарност и искрена радост, повторно се враќам на своето работно место. Ова враќање за мене претставува лична победа,“ напиша Лукровски.

Тој упати благодарност до заменик-градоначалникот, премиерот Христијан Мицкоски, својот тим во општината, како и до колегите, семејството, пријателите и медицинските лица за поддршката во периодот на закрепнување.

Во објавата Лукровски ги демантираше, како што ги нарече, шпекулациите и лагите поврзани со неговото име, обвинувајќи дека одредени поединци и политички субјекти се обиделе да извлечат политички поени од неговата состојба.

Тој порача дека се враќа со нова енергија и продолжува со работа во интерес на граѓаните и развојот на општината.