Советот на Општина Кочани го поништи решението на в.д. градоначалникот за запирање на одлуката за формирање паралелки со помал број ученици

Советот на Општина Кочани на 69. седница што се одржа денеска во Мултикултурниот центар гласаше против Решенението на в.д. градоначалникот Венко Крстевски за запирање на одлуката за формирање паралелки со помал број ученици во општинските основни училишта за учебната 2025/26 година, донесена на 27 август.

Ова значи дека педесеттината наставници на кои на 31 август не им беа продолжени договорите, се враќаат на работа. Бројот на паралелките не се намалува. 

Одлуката на Советот на Општина Кочани, која денеска беше донесена со 16 гласа против и еден воздржан, треба да биде објавена во Службен гласник.

Претседателот на Советот на Општина Кочани, Лазо Митев, на седницата рече дека има информација оти вчера до Јавното обвинителство е поднесена кривична пријава за злоупотреба на службена должност и овластувања.

-  Како претседател стојам зад тоа целата оваа работа да се испита. Зошто се крие документот со кој МОН дава позитивно мислење за формирање паралелки со помал број ученици. На 5–ти овој месец тој документ е пратен до в.д. градоначалникот, потпишан од министерката за образование. Денеска сме 12–ти, а  документот се уште го нема во Општината. Се сомневам дека некој го крие. Зошто, праша Митев.

В.д. градоначалникот Венко Крстевски не присуствуваше на седницата.

Претставник на општинската администрација од секторот образование ги информираше советниците дека уште пред да настане овој проблем, Министерството за образование ги одобрило вработувањата на наставниците на кои на 31–ви август не им беше продолжен работниот однос. Според тоа, финансиски импликации за училиштата поради продолжување на договорите за работа на педесетте наставника нема да има.