Бол и Ингебригстен најдобри европски атлетичари во 2023

Холанѓанката Фемке Бол и Норвежанецот Јакоб Ингебригстен ги освоија наградите за најдобри европски атлетичари во машка и женска конкуренција во 2023 година на синоќешната свеченост во Вилнус.

По двете златни медали на Европското првенство во сала во Истанбул, Бол на Светското првенство на отворено во Будимпешта се закити со златото на 400 метри со пречки и ја предводеше холандската женска штафета до златото на 4×400 метри. Воедно постави нов светски рекорд на 400 метри во сала и европски рекорд на 400 метри со пречки на отворено.

Најдобриот европски атлетичар во 2023, Ингебригстен, во Будимпешта освои злато во трката на 5.00 метри и сребро на 1.500 метри, повторувајќи го со тоа успехот од пред една година на Светското првенство во Јуџин.

Одличниот Норвежанец, исто така, постави нови европски рекорди на една милја и на 3.000 метри и 1.500 метри, како и светски рекорди во дисциплините кои ретко се трчаат, на 2.000 метри и две милји.