Судската администрација без додаток на плата во февруари

Нема пари за додаток на плата за вработените во судската служба. Судски буџетски совет го одби барањето за исплата и најави дека повторно ќе го разгледува до средина на месецов. За да не доцнат платите, одлучи пресметките за февруари да се прават без додатокот од 10 отсто.

„Да се изготви платата за месец февруари без пресметка на додатоци на плата, а Одлуката за обезбедување средства за исплата на додатоци на плата за месец февруари повторно ќе се разгледува на наредна седница што ќе се закаже најдоцна до 15 март“.

Ваквата одлука ги револтираше судските службеници. Бараат итно враќање на додатокот или како што велат, одат на штрајк.

„Секогаш кога се покачуваат функционерските плати како лани во март кога останавме без додатоци, еве сега со одлуката за К-15 за судиите, повторно вработените во судовите ќе останат без додатоци и ние апелираме и до СБС во најскоро време да одлучи да ни ги врати назад додатоците, во спротивно, револтот е огромен и се најавуваат штрајкови во сите судови во државата“, изјави Јасмина Величковска, Независен синдикат на судската служба.

Судските службеници ги повикаа пратениците но и премиерот да не се гласа Законот за судска служба кој утре ќе се најде пред пратениците, бидејќи како што тврдат со него ќе се намалат нивните плати.

„Со овој закон, вработените ќе имаат дисбаланс во платите, односно, оние вработени што се во согласност со Законот за работни односи, ќе добијат нивелирање на платите и оние вработени кои што се согласно Законот за судска служба нема да добијат нивелирање на платите, односно ќе останат за 2 илјади денари помала плата. И без додатоци и со помала плата“, вели Величковска.

За неполна година, вторпат судската служба останува без додаток на плата.