Тоше живее во секое добро дело - детската улица се претвори во песна, а споменот во емоција

Најубавата детска улица која го носи името на нашиот Тоше, денеска пееше во негова чест. Иако неговата музика секојдневно се слуша тука, денеска потсетувајќи се на кобниот 16ти октомври од пред 19 години, најмалите ги пееја неговите хитови и испратија пораки за добрина и сплотеност како што тој се залагаше. Музичкиот хепенинг „Тоше те сакаме“ ги сплоти сите генерации.

Младите ги знаат и сакаат неговите песни иако немаа можност да го гледаат или запознаат во живо. Велат дека споменот за Тоше никогаш нема да избледе.

Тоше остави богатство и белег за сите генерации, велат неговите колеги кои и денеска заедно со децата ги пееја неговите песни. 

Детската улица доби и нова цветна градина , со стихот од песната Игри без граници, а учениците од училиштето „Лазо Ангеловски“ во Ново Лисиче заеднички со родителите направија уште едно катче во чест на Тоше. 

Тоше не е само спомен од минатото – тој е љубов што ќе трае засекогаш.