Турција побара од УЕФА и ФИФА да го суспендираат Израел

Турција официјално стана првата членка на Европската фудбалска асоцијација (УЕФА) која јавно повика на суспензија на Израел од меѓународниот фудбал, оценувајќи ја ситуацијата во Газа како „нехумана и неприфатлива“.

Агенцијата Анадолија јави дека претседателот на Фудбалската асоцијација на Турција, Ибрахим Хаџиосманоглу, испратил во петокот писмо до лидерите на светскиот фудбал, пред седницата на Извршниот комитет на УЕФА следната недела, на која би можело да се гласа за евентуална суспензија на Израел.

„Сега е време ФИФА и УЕФА да дејствуваат. И покрај тоа што се позиционираат како бранители на граѓанските вредности и мирот, спортскиот свет и фудбалските институции долго време молчат“, наведува Хаџиосманоглу во писмото.

Американскиот Стејт департмент во четврток објави дека ќе работи на спречување на каков и да е обид за исклучување на Израел од Светското првенство во 2026 година во САД, Мексико и Канада.

Претседателот на ФИФА, Џани Инфантино, е близок до организаторите на Светското првенство и претседателот на САД, Доналд Трамп, и се чини малку веројатно дека би поддржал суспензија на Израел.

Израел се натпреварува во квалификациите за Светското првенство, а следниот натпревар ќе го игра во Осло на 11 октомври.

МИА