Утре во 11:00 седница за избор на техничка Влада, за ДУИ денот е историски

Мандатарот за состав на техничката влада ја напиша програмата по која новиот владин состав ќе работи во следните 100 дена. Џафери на 12 страници ги напишал целите и приоритетите за работа. Организирањето претседателски и парламентарни избори е стратешки и државен приоритет, продолжување на процесот на европска интеграција, а како што се наведува во програмата, техничката влада ќе работи и на развој на економијата, а ќе ја продолжи и борбата со корупцијата.

„Владата врз основа на широкиот меѓу-партиски дијалог, ќе овозможи ефикасно имплементирање на препораките  на ОБСЕ/ОДИХР и останатите меѓународни организации, а со цел да се овозможат највисоките европски стандарди во процесот во изборната кампања и самите избори, односно, да се одржат избори со целосен легалитет, легитимитет и консензуално прифаќање на изборната волја на граѓаните“

Седницата за избор на новата владата почнува утре во 11 часот.. До недела на полноќ е рокот во кој пратениците треба да гласаат за новиот владин кабинет во кој свои министри и заменици има и опозицијата.

Лидерот на ВМРО-ДПМНЕ, повтори дека пратениците од партијата со која раководи и коалиционите партнери, нема да ја поддржат техничката влада. Мицкоски смета дека техничкиот премиер Џафери ќе ги продолжи лошите политики кои ги водел и како претседател на Собранието.

За лидерот на ДУИ, утрешниот ден е историски. Ахмети во видео обраќање порачува дека тоа што ќе се направи утре ќе го трасира животот на идните генерации.

Освен програмата, пред пратениците ќе се најдат и биографиите на сите кандидати за министри во техничката влада. Прв на листата е мандатарот Џафери, за кого пишува дека во 2001 од македонската армија се приклучува кон ОНА, а една година подоцна ја почнува својата политичка кариера, која по 22 години ја крунисува со премиерска позиција која ќе ја извршува 100 дена.