Во Белгија едно од 20 деца го повторува првото одделение

Повеќе од еден од 20 ученици во Белгија го повториле првото одделение од основно училиште минатата учебна година, според податоците од белгиското Министерство за образование. Стручњаците проценуваат дека овој број би можел да се намали со воведување на можноста децата да останат во градинка уште една година.

Според податоците од Министерството, 5,6 отсто од учениците од прво одделение минатата година биле повторувачи. Овој број останува приближно ист со години и е поголем отколку во следните одделенија. Професорката на Универзитетот Хаселт, Мике Гус, која го истражувала повторувањето одделенија, наведува дека темелите за јазикот и математиката се поставуваат во прво одделение, поради што учениците кои имаат тешкотии со совладувањето на основните знаења честопати не продолжуваат во второ одделение. Одделенската наставничка Селина од Антверпен вели дека речиси секоја учебна година има ученик на кого му се препорачува да го повтори одделението, а тоа се претежно деца кои, според стручњаците, не се подготвени за училиште до крајот на третата година од одењето в градинка.

Досега, препораката на стручниот совет во третата година од градинката не беше обврзувачка, па родителите можеа да го запишат своето дете во прво одделение и покрај препораката да остане во градинка.

Директорката на градинката „Ховен“ во Кастерли, Елке Алард наведува дека родителите често одлучуваат да го преместат своето дете во прво одделение и покрај советот да остане во градинка, и дека проблемите може да се појават и подоцна ако детето сè уште не е доволно социјално и емоционално зрело за училиште. Се проценува дека третата година од градинката им дава на децата дополнително време да развијат математички вештини, за препознавање букви, работни навики, како и социјална и емоционална зрелост.

Гус, сепак, верува дека подобро решение би било децата да напредуваат заедно со своите врсници со дополнителна поддршка, но истакнува дека ресурсите на училиштата се ограничени. Според неа, затоа често е полесно да се задржи детето уште една година отколку да се обезбеди дополнителна поддршка.

На крајот од претстојната учебна година, препораката да останат во градинка ќе стане обврзувачка, што, според очекувањата, би можело да го намали бројот на ученици што го повторуваат првото одделение.

МИА