Вучиќ за утврдување одговорност за посетата на повредените од Кочани: Никој не ме пушти, сам си влегов, и што сега?

Претседателот на Србија, Александар Вучиќ изјави дека самиот влегол во Клиничкиот центар на Србија за да ги посети повредените во пожарот во дискотеката во Кочани.

Изјавата на Вучиќ доаѓа откако студентите во блокада во Србија поставија и шесто барање, а тоа е да се утврди кој е одговорен за посетата и престојот на новинарските екипи во Клиничкиот центар на повредените во пожарот во Кочани.

„Здравствената установа и одговорните лица во таа установа кои дозволуваат голем број неовластени и несоодветно обучени лица да влезат на одделението за интензивна нега и да снимаат, фотографираат, па дури и да допираат тешки пациенти, ги прекршуваат елементарните правила на струката и протоколите во постапувањето со имунокомпромитирани пациенти“, соопштија студентите завчера, кога го изнесоа шестото барање..

Поради овој инцидент тие бараат поведување постапка за утврдување одговорност и разрешување на директорката на УКЦС Јелена Друловиќ, директорот на Ургентниот центар на УКЦС Марко Ерчеговац и началникот на одделението за интензивна нега на Ургентниот центар на УКЦС, Душан Мициќ.

–Не мора никого да бркаат. Го решија шестото барање. Па, јас сум тој. Гордиот Александар Вучиќ, кој учествуваше и чија идеја беше да се изгради и обнови Клиничкиот центар, да инвестира огромни пари, рече тој одговарајќи на прашања на новинарите во Париз по средбата со францускиот претседател Емануел Макрон.

–Отидов да ги посетам. Тоа беше моја волја, никој не мораше да ме пушти, влегов сам. И, што ќе се случи сега? Ништо, рече тој.

Вучиќ додаде дека Србија има модерен клинички центар, и тие луѓе имале каде да дојдат на лекување.