45 евра казна ако поминете на зелено но останете заглавени сред кстосница

45 евра казна ќе добиваат возачите кои ќе влезат на крстосница на зелено светло, но поради метеж ќе останат заглавени во нејзината средина. Ова е предвидено во рамки на системот „Сејф Сити“, потврди министерот за внатрешни работи Панче Тошковски.

Во ваквите ситуации прекршокот нема да се смета за поминување на црвено светло, туку како попречување или забавување на сообраќајот на самата крстосница, што е посебно дефиниран сообраќаен прекршок. Тоа значи дека возачите ќе треба однапред да проценат дали имаат услови безбедно да ја минат крстосницата, дури и кога семафорот е зелен.

За време на тестирањето биле забележани случаи во кои камерите регистрирале поминување на црвено, иако возилото влегло додека било зелено светло. Надлежните појаснуваат дека системот е прилагоден и дека отсега ваквите ситуации нема да се водат како поминување на црвено, туку како т.н. „блокирање“ на крстосница.