Анализа на дописникот на „Скај њуз“ од Москва: Украина и сојузниците ќе бидат разочарани и загрижени за исходот од разговорот меѓу Трамп и Путин

Украина и нејзините европски сојузници ќе бидат разочарани, па дури и загрижени по рускиот приказ на телефонскиот разговор меѓу Владимир Путин и Доналд Трамп, оценува московскиот дописник на „Скај њуз“, Ивор Бенет.

„Мислам дека европските лидери и Украина ќе бидат многу разочарани што Доналд Трамп очигледно не изврши поголем притисок врз Владимир Путин. Тие се надеваа дека ова ќе биде моментот кога Трамп конечно ќе ги спроведе своите закани во дело и ќе го принуди Путин да се приближи кон прекин на огнот.“

Според тврдењата на Путин, во разговорот немало никакво споменување на санкции, а Трамп дури рекол дека Русија поддржува мирно решение на кризата.

„Верувам дека оваа изјава на рускиот претседател ќе предизвика загриженост кај европските сојузници на Украина. Тие веројатно ќе ја протолкуваат како уште едно одложување од руска страна и избегнување на јасен одговор на барањата за 30-дневно примирје.“

Иако разговорот траел повеќе од два часа, Бенет истакнува дека се чини дека не е постигнат никаков вистински напредок.

„Се чини дека овој повик не донесе никаков напредок кон мировен договор, па дури ни прекин на огнот во Украина.“

Изјавата на Путин дека примирје е можно доколку се постигнат соодветни договори, „е во основа иста како онаа што Русија ја повторува веќе два месеци“.

Бенет додава дека „меморандумот за идните мировни преговори“ всушност значи само дека разговорите ќе продолжат.