Ангелов: Состојбата со водата во Гостивар постепено се стабилизира, но се уште не е погодна за пиење и за готвење

Состојбата со водата во Гостивар посетепено се стабилизира. Бројот на бактерии е значително намален, но водата се уште не е подобна за употреба како вода за пиење и останува забраната за нејзино пиење и готвење. Водата може да користи како техничка вода. Агенцијата за храна и ветеринарство е таа која што ќе каже кога водата ќе биде добра за пиење, изјави вечерва директорот на Дирекцијата за заштита и спасување Стојанче Ангелов, кој воедно е и шеф на Кризниот штаб формиран од Владата.

Агелов рече дека најверојатно водата ќе биде дозволена за пиење наредната недела, ако резултатите останат вакви какви што се сега.

Во однос на присуството на бактерија од застоена вода во водоводот, Ангелов рече дека во јавноста настанало недоразбирање бидејќи количината на таа бактерија била многу ниска, но сепак ја прави водата непогодна за пиење, но не и опасна за граѓаните за користење како техничка вода.

Од друга страна, вели тој, поради хиперхлорирањето што трае веќе подолго време состојбата е значително подобрена, но откако ќе се утврди во неколку резултати последователно, барем три дена, дека нема присуство на каква било бактерија, односно дека водата е микробиолошки исправна, треба да се почека вишокот на хлор што е намерно вметнат да ги убие бактериите, да се доведе на нормала и дури тогаш АХВ ќе утврди дали водата е погодна за пиење или не.

Во истиот момент граѓаните, според Ангелов, ќе се соочат со основниот проблем - а тоа е малата количина во водоводниот систем во Гостивар.

-Се започнува од овој проблем. Нема доволно вода во водоводниот систем поради што и неколку лица од Водовод ги ставиле несреќно оние цевки во отворена вода за дотур на вода во Градскиот водовод - рече директорот на ДСЗ, кој смета дека треба да се провери зошто водоводот во Гостивар не бил реконструиран досега.  

Тој вели дека е повеќе од сигурен дека некој ќе сноси кривична одговорност, бидејќи има лица кои беа приведени и се во притвор.

- Мислам дека ќе бидат покренати соодветни кривични пријави од страна на Јавното обвинителство, така што повеќе од сигурно ќе има одговорност и кривична. Затоа што е недозволиво ваквото однесување на локалната власт, иако еве последниот градоначалник е релативно кратко време, но ова е позиција за да може нешто да промени, рече Ангелов.

Во однос на пожарите, рече дека од аспект на нивниот број летово имаме безмалку ист број на пожари како минатата или предминатата година, но оти оваа година одговорот е многу подобар и побрз.

-Направивме одредени законски измени, она сè што беше во надлежност на Владата е максимум преземено. Од аспект на ресурси исто така сме подобрени, или барем оние ресурси коишто ги имаме ги ставивме во функција. За првпат после долги години, трите ер-трактори беа подготвени за дејство со три пилоти на почетокот на сезоната, значи на почетокот на јуни пред да започнат пожарите. Тие ја имаат можеби и клучната улога, покрај локалните пожарникари, да не дозволиме ширење на пожарите, односно само неколку пожари да излезат од контрола, условно кажано, и да направат посериозни пожари - рече Агелов. 

Според него, брзата употреба на ер-тракторите им помага на локалните пожарникари, за кои кажа дека се покажало дека се на висина на задачата, излегуваат на терен, пожртвувано се борат против пожарот, и пожарите се совладуваат во прва фаза, пред тие да зафатат поголеми површини или пред да навлезат на терен којшто е тежок за гаснење.

МИА