Авион на „Ер Индија“ принудно слета на островот Пукет во Тајланд по закана за поставена бомба

Авион на компанијата „Ер Индија“ безбедно принудно слета денеска на аеродромот на островот Пукет во Тајланд по закана за поставена бомба, соопшти аеродромот.

Во соопштението се наведува дека авионот со 156 патници полетал од островот Пукет кон Њу Делхи и побарал итно слетување поради закана за поставена бомба, по што аеродромот Пукет го активирал својот план за вонредни состојби, пренесе кинеска новинска агенција.

Претставник на аеродромот изјави дека авионот безбедно слетал.

Инцидентот следува по урнувањето на авионот на „Ер Индија“ во Ахмедабад вчера кратко по полетувањето, при што загинаа 241 лицe.

Индиските авиокомпании и аеродроми се преплавени со лажни закани со бомби минатата година, со речиси 1.000 лажни повици и пораки примени во првите 10 месеци, речиси 10 пати повеќе отколку во 2023 година.