Азир Алиу го промовираше Здравствениот совет - Најави и ангажман на лекари од приватно во јавни установи

Деветчлен Здравствен совет е новото советодавно тело на министерот Азир Алиу кое ќе анализира и советува за актуелните проблеми и дилеми во здравствениот сектор. Но на денешната прва седница не дебатирале и за темата која е во фокусот со недели а граѓаните очекуваат одговори дали и кој правел непотребни кардиолошки и кардиохируршки интервенции. 

За тоа ќе имале посебна седница кога интерната комисија ќе направи извештај по разгледување на 8-те сомнителни случаи што ги доставиле лекари од Клиниката за кардиологија и кардиохирургија. А се уште ги нема и странските доктори кои треба да се вклучат во надзорот бидејќи имало административни процедури. Дали ќе се остане на овие досиеја на пациенти или ќе има и други, според министерот ќе зависи и од контролите на Лекарската Комора.

- Лекарската комора нема да ги анализира овие досиеја, значи тие 8 случаи се веќе предадени во Комисијата која ги анализира. Лекарската Комора ќе оди ад хок други случаи да бара за да ги анализира за да нес е дуплираат и на крајот тој извештај ќе биде предаен и на Комората, и на експертите и на здравствениот совет за да може да се направи компарација, вели Азир Алиу, министер за здравство.

Министерот за здравство за овој проблем денеска не разговарал и со менацментите на трите приватни болници со кои склучи меморандуми за соработка. Планот е ангажирање на специјалисти од приватниот сектор во јавните здравствени установи во случаи на зголемени потреби или недостиг на кадар.

- Вие знаете дека универзитетските клиники не само што имаат експерти имаат и професори што им биле ментори на тие доктори. Еве да оставиме времето да видите колку има заинтересирани кои би сакале да работат надвор од матичната установа во државните. Како што ги плаќаме сите други човечки капацитети така ќе ги платиме  и нив, вели Алиу. 

Инаку, министерот и денеска нагласи дека од 15 септември приватните здравствени болници треба задолжително да го информираат министерството, односно Мој Термин за сите извршени прегледи и интервенции.