Барди со Трабзон поразен во Белград од Црвена Звезда

Уште шест слободни места остануваа за првата нокаут рунда во фудбалската Лига на Европа.  Ова откако беше комплетирано претпоследното коло во групната фаза, по која неколку екипи и теоретски го обезбедија својот пласман во 1/16.финалето 

 

Македонија сигурно ќе има најмалку еден свој претставник во 1/16.финалето на Лига Европа. 

 

Езџан Алиоски со својот тим Фенербахче ќе биде дел од разигрувањето, но останува да се види дали турската екипа ждрепката ќе ја дочека од првата позиција, за која претендира и францускиот Рен.

 

Ова откако нивниот меѓусебен дуел одигран во Истанбул заврши без победник 3-3, па двата тима остануваат на ист број на бодови 11. 

 

Фенер во последното коло ќе игра против Динамо Киев кој на гостувањето во Ларнака кај АИК одигра нерешено 3-3, но недоволно да обезбеди барем 3.место кое води во разигрувањето во Конференциската лига во која место осигура кипарскиот тим на македонскиот интернационалец Иван Тричковски кој поради повреда го пропушти дуелот со Французите.

 

Енис Барди кој го носи дресот на Трабзонспорт, ќе мора во последното коло да брка пласман во разигрувањето. 

 

Ова откако турската екипа беше поразена на гостувањето во Белград од Црвена Звезда со 2-1, меч во кој при резултат 0-0 Барди ја погоди стативата. 

 

Така Црвена Звезда и Трабзонспор сега имаат по 6 бодови, еден помалку од Монако кој одиграа 1-1 со Ференцварош, доволно унгарскиот тим да обезбеди 1/16-финале. 

Токму Ферецварош ќе му гостува на Трабзонспор во последното 6.коло закажано за во четврток, 3 ноември.