Бројот на жртви во земјотресот во Индонезија се искачи на 111, над 176.000 лица се раселени

Бројот на загинати во силниот земјотрес со магнитуда од 7,7 степени што ја погоди индонезиската провинција Источна Нуса Тенгара на 15 август се искачи на 111 лица, додека повеќе од 176.000 луѓе и натаму се раселени, соопштија денеска локалните власти.

Раководителот на Центарот за комуникации при Националната агенција за управување со катастрофи (БНПБ), Бертон Панџаитан, изјави дека во привремените засолништа во моментов престојуваат 176.621 лице. Покрај потврдените 111 жртви, во катастрофата се повредени 1.678 лица, а оштетени се повеќе од 36.000 куќи и јавни објекти.

Сеизмолошките служби од првичниот потрес досега регистрираа дури 8.193 последователни земјотреси низ целата провинција. Операциите за спасување и распределбата на хуманитарна помош непречено продолжуваат во сите погодени подрачја, меѓу кои е и познатиот туристички центар Лабуан Баџо.