Цените на нафтата растат откако Иран постави услови за повторно отворање на Ормуската Теснина

Цените на нафтата денеска пораснаа откако условите што ги постави Иран за повторно отворање на Ормуската Теснина предизвикаа загриженост дека нарушувањата на глобалните енергетски пазари би можеле да продолжат подолг период.

Цената на референтната северноморска нафта „брент“ со испорака во октомври се зголеми за 1,09 отсто, на 84,46 долари за барел, додека американската нафта „Вест Тексас интермедијат“ (ВТИ) со испорака во септември поскапе за 0,84 отсто, на 78,84 долари за барел.

Иранскиот министер за надворешни работи Абас Арагчи вчера изјави дека овој стратешки поморски пат нема да биде повторно отворен додека Вашингтон не ги исполни условите, меѓу кои се ублажување на санкциите и исплата на воени репарации. Тој, исто така, посочи дека Техеран во моментов нема директни разговори со САД, и покрај тврдењата од Вашингтон дека договорот е близу.

„Ормуската Теснина и понатаму е практично затворена“, соопшти „Вестпак“, додавајќи дека неизвесноста останува висока додека војната меѓу Иран и САД влегува во својот шести месец.

И покрај нестабилноста на енергетскиот пазар, азиските берзи пораснаа. Јапонскиот индекс „Никеи 225“ се зголеми за 2,1 отсто, јужнокорејскиот „Коспи“ порасна за 0,7 отсто, а хонконшкиот „Ханг Сенг“ бележи раст од 0,6 отсто. 

МИА