Долгоочекуваното судење на наводниот организатор на нападите од 11 септември закажано за 2028 година

Судењето на наводниот организатор на нападите од 11 септември 2001 година и на другите обвинети е предвидено да почне на 5 јуни 2028 година, според наредбата на воениот судија кој го води случајот.

Датумот сепак би можел да биде поместен, бидејќи неколку процедурални прашања остануваат нерешени, вклучувајќи го и тоа кои докази ќе бидат дозволени на судењето, пренесе ДПА.

Во терористичките напади на 11 септември 2001 година четири патнички авиони беа киднапирани и употребени за напади врз Светскиот трговски центар во Њујорк и седиштето на одбраната, Пентагон, во близина на Вашингтон. Четвртиот авион се урна во Пенсилванија. Притоа загинаа околу 3.000 луѓе.

Се верува дека Калид Шеик Мохамед е мозокот зад нападите, кој ги координирал комуникациите и финансирањето на операцијата. Тој беше уапсен во Пакистан во 2003 година, а подоцна испрашуван од ЦИА. Според извештај на американскиот Сенат, тој бил мачен за време на испрашувањата.

Мохамед беше префрлен во американскиот притворен центар во Гвантанамо Беј во 2006 година, каде што требаше да се соочи со воен трибунал за неговата улога во нападите. Постапките против него и неколкумина сообвинети се одложуваат со години.

Притворскиот центар се наоѓа во американската поморска база во Гвантанамо Беј на Куба. Во својот врв, речиси 800 луѓе беа притворени таму откако беше основан за време на поранешниот американски претседател Џорџ В. Буш по нападите на 11 септември.

Групите за човекови права долго време се залагаат за негово затворање, но таму сè уште има мал број притвореници.

МИА