Гаши-Варнс: Поддршка за реформите и стратешкото партнерство со САД

Претседателот на Собранието Африм Гаши, на денешната работна средба со заменик-амбасадорката на Соединетите Американски Држави, Никол Варнс, порача дека институцијата дејствува ефикасно во усвојувањето на законите од Реформската агенда и останува посветена на квалитетната дебата и унапредувањето на стратешкото партнерство меѓу двете земји.

Како што информираат од Собранието, Гаши ја запознал заменик-амбасадорката Варнс со ангажманот на законодавниот дом во исполнувањето на приоритетите од процесот на пристапување во Европската Унија. Тој подвлекол дека приоритет на Собранието останува создавањето простор за квалитетна дебата и донесување закони во согласност со демократските стандарди.

Важна тема на разговорот било и унапредувањето на процесите на дигитализација во Собранието, како предуслов за зголемување на функционалноста, транспарентноста и институционалната безбедност. Дополнително, соговорниците разговарале за значењето на парламентарната дипломатија и за зајакнувањето на соработката со меѓународните законодавни институции.

– Претседателот Гаши изрази искрена благодарност за континуираната американска поддршка, потврдувајќи уште еднаш колку е важно стратешкото партнерство со САД. Од своја страна, Варнс ги оцени неговите напори за градење мостови на разбирање меѓу политичките субјекти и различните заедници во земјата. На крајот од средбата, соговорниците повторно ја потврдија посветеноста за продолжување на блиската соработка во насока на зајакнување на демократијата, меритократијата и функционалните институции, како клучни вредности за иднината и демократскиот развој на земјата – стои во соопштението.

МИА