Ѓорѓиевски: Покрај големите капитални проекти, работиме и на секој детал што значи поголем ред, безбедност и урбана култура

Скопје се уредува до најситен детал. Покрај големите капитални проекти што го менуваат ликот на градот, со еднакво внимание работиме и на секој детал што значи поголем ред, безбедност и урбана култура - пишува скопскиот градоначалник Орце Ѓорѓиевски во денешната објава на неговата фејсбук-страница.

Тој информира дека интензивно се врши обележување на хоризонталната сигнализација, како и замена на дотраената вертикална сигнализација на градските сообраќајници. Јасната, видлива и функционална сигнализација, истакнува градоначалникот, е основа за побезбеден сообраќај, подобра организација и поголема сигурност за сите учесници во сообраќајот.

-Паралелно, се поставуваат и заштитни столпчиња по должината на булеварите со цел да се заштити јавниот простор, да се обезбедат пешачките и велосипедските патеки и да се стави крај на паркирањето онаму каде што не му е место. Узурпацијата на јавниот простор не смее и нема да биде пракса во Скопје. Се уредува и зеленилото, кое е во надлежност на Град Скопје. Чисти и уредени паркови, булевари и јавни површини се слика што му дава дополнителна убавина и достоинство на нашиот град. Континуирано се чистат и коритото на реката Вардар на територијата на град Скопје - додава Ѓорѓиевски во објавата.

Градоначалникот информира и дека во скопската Зоолошка градина се уредуваат пешачките зони, а континуирано се работело и на подобрување на пешачките и велосипедските патеки во градот.

-Јавните претпријатија работат со полн капацитет затоа што скопјани заслужуваат чист, уреден, безбеден и модерен град. Продолжуваме за достоинствено Скопје - истакнува градоначалникот.

МИА