Го киднапирале, со пиштол му се заканувале да признае наводно силување, ОЈО бара притвор за двајцата грабнувачи

Како сцена од акционен филм, но далеку од фикција, на 12 април двајца мажи од селото Корешница, Демир Капија, киднапирале 21 годишник со намера да го присилат да сними изјава во која ќе признае дека ја силувал сопругата на првоосомничениот. Еден од киднаперите, имал репетиран пиштол, со кој му се заканувал додека го држеле под контрола.

Драмата започнала во Неготино, каде оштетениот бил внесен во возилото. Оттаму, започнало возење по стариот пат кон Демир Капија, патување исполнето со закани и насилство. Во текот на целиот пат, додека тројцата биле во автомобилот, киднаперите не престанувале да му се закануваат по живот и физички да го напаѓаат, удирајќи го со боксови. За да го дезориентираат и целосно да го лишат од чувство за контрола, му го одзеле и фрлиле мобилниот телефон, а на главата му ставиле црни ќеси, со што му оневозможиле да види каде го носат.

Кога стигнале во шума, го извадиле од возилото и го терале да слуша аудио снимки и да признае дека тој е сниманото лице, но оштетениот за цело време негирал. Поради тоа, двајцата осомничени му се заканувале дека ќе го силуваат и ќе го убијат, па го удирале со боксови и со пластична цевка, нанесувајќи му тешки телесни повреди, соопштија од Обвинителството.

Но, во развој што наликува на пресврт во филмско сценарио, оштетениот пред да му биде фрлен мобилниот телефон, испратил порака за помош до полицијата. Дополнително неговите соседи го виделе моментот кога бил внесен во возилото, па полицијата за кратко време ги идентификувала грабнувачите и стапила во контакт со нив. 

Соочени со фактот дека се откриени, двајцата мажи го однеле оштетениот директно во полициската станица во Неготино.

Обвинителството бара притвор за двајцата киднапери, поради опасност од бегство, бидејќи станува збор за тешко кривично дело за кое е предвидена најмалку четири годишна казна затвор.