Холивуд има тајна стара 75 години: Истиот крик се слуша во над 400 филмови, серии и видеоигри

Еден ист човечки крик се користи во филмови, телевизиски серии и видеоигри веќе 75 години. Станува збор за звучниот ефект познат како „Крикот на Вилхелм“ (Wilhelm scream), кој се појавил во повеќе од 400 филмски и телевизиски продукции, станувајќи еден од најпознатите звучни ефекти во историјата на кинематографијата.

Крикот првпат бил употребен во 1951 година, во филмот „Distant Drums“, во сцена во која алигатор напаѓа војник и го повлекува под вода.

Своето име го добил две години подоцна, по ликот на војникот Вилхелм од филмот „The Charge at Feather River“ од 1953 година, кој испушта силен крик откако е погоден со стрела.

Сепак, вистинската популарност ја стекнал во 1977 година, кога дизајнерот на звук Бен Берт го употребил во првиот филм од серијалот „Војна на ѕвездите“. Оттогаш крикот станал своевидна традиција и скриена шега меѓу филмските работници.

Звучниот ефект најчесто се користи во сцени во кои ликовите паѓаат од височина, се повредуваат, се погодени или се исфрлени при експлозии.

Со текот на годините, крикот се проширил и во телевизиските серии и видеоигрите, а неговото повторување станало препознатлив детаљ за филмските љубители.

Иако повеќето гледачи не го забележуваат, овој краток крик од 1951 година и денес продолжува да се користи, дури 75 години по неговото прво појавување.