Хорор во Шутка: Улично куче искасало 18-месечно дете, родителите бараат итна реакција

Едно и пол годишно дете било нападнато и искасано од улично куче во дворот на семејниот дом во Шуто Оризари, според сведоштвото на неговите родители, пренесува РомаПрес.

Како што раскажува семејството, кучето најверојатно влегло во дворот додека роднините биле на терасата. Кога мајката се обидела да го избрка кучето, според нејзиното сведоштво, тоа се упатило кон детето и го нападнало.

При нападот, детето претрпело повеќе каснувања и повреди по телото, вклучително и во пределот на лицето, увото и главата. По инцидентот веднаш било однесено во здравствена установа, каде што му била укажана медицинска помош.

Во медицинската документација случајот е евидентиран како каснување од куче. Настанот бил пријавен во полиција, а семејството за случајот ангажирало и адвокат.

Родителите велат дека поседуваат медицинска документација со која се потврдува дека детето било згрижено и третирано поради повредите предизвикани од каснувањето од кучето.