Иранскиот претседател повикува на промена во стилот на лидерство во земјата

Иранскиот претседател Масуд Пезешкијан синоќа повика на фундаментална промена во стилот на лидерство во земјата, додека неговиот кабинет ги негираше гласините дека планира да поднесе оставка, јави ДПА.

Пезешкијан рече дека раководството на Иран не смее да се состои од ограничена група лидери и функционери, пренесе државната агенција Фарс, која е поврзана со моќниот Корпус на Исламската револуционерна гарда (ИРГЦ).

Тој повика на вклучување на сите општествени групи, економски засегнати страни и научници, како и на пошироката јавност, во процесите на донесување одлуки во Иран, пренесе германската агенција.

Барањето на Пезешкијан, реформатор, е во остра спротивност со реалноста во Иран, каде што клучните владини позиции со децении ги држат лица со блиски врски со ИРГЦ.

Пезешкијан тврдеше дека колку повеќе јавноста е вклучена во процесите на донесување одлуки и решавање проблеми, толку е поголема шансата за успешно надминување на предизвиците.

-Кога луѓето се соочуваат со тешкотии, оние на власт мора да застанат покрај нив и да работат на решавање на проблемот, рече тој.

Иран постојано се соочува со национални антивладини протести поради широко распространето незадоволство од авторитарното раководство, како што беше случајот на почетокот на годината.

Она што започна како протести на сопствениците на продавници поради економската состојба се претвори во еден од најголемите бранови немири во последните години.

Властите одговорија со брутално задушување, а се верува дека илјадници луѓе се убиени.

Во меѓувреме, канцеларијата на Пезешкијан ги негираше шпекулациите дека претседателот ја поднел својата оставка до врховниот лидер на Иран, Моџтаба Хамнеи, велејќи дека Пезешкијан нема да престане да му служи на иранскиот народ.

Пезешкијан, исто така, ги повика Иранците да штедат електрична енергија и гориво додека земјата се справува со последиците од војната меѓу САД и Израел, вклучително и блокадата на иранските пристаништа од страна на САД.

Доколку Иран не ја намали потрошувачката на електрична енергија, гас и други извори на енергија, тоа негативно ќе влијае на одредени сектори на индустриското производство, предупреди Пезешкијан. Населението мора да биде свесно за моменталните реалности, како и за барањата и трошоците за отпор, рече тој, пренесе ДПА.

МИА