Истрага за семејно насилство во Батинци – тешко повреден маж, вмешани татко, син и малолетник

Основното јавно обвинителство Скопје отвори истрага против две полнолетни лица, татко и син, осомничени за кривично дело насилство, како и против еден малолетник, согласно Законот за правда за децата, поради брутален напад врз маж во селото Батинци.

Според обвинителството, 41-годишниот татко, заедно со своите синови – едниот 18-годишен, а другиот 15-годишен, дошле пред домот на оштетениот и започнале да му се закануваат поради претходна расправија со малолетниот син. 

- Во еден момент, почнале да го удираат со клоци и тупаници по главата и целото тело, од кои удари оштетениот паднал на земја. Додека лежел на земјата, детето го удирало и со камен, па оштетениот се здобил со тешки телесни повреди – фрактури и други тешки повреди во главата и телото. Сопругата на оштетениот паднала врз него за да го заштити од дополнителни удари, а притрчале и нивните деца и соседите, стои во соопштението од ЈО.

Со дејствијата на насилство, малтретирање, грубо навредување и загрозување на сигурноста, како што дополнуваат, осомничените предизвикале чувство на несигурност и страв и кај членовите на семејството на оштетениот и во јавноста.

Поради сериозноста на делото, јавниот обвинител побарал определување мерка притвор за полнолетните осомничени, додека за малолетникот се води постапка согласно Законот за правда за децата.