Кои се потенцијалните ризици за корупција кај локалните власти?

Управни постапки и односи со странки, внатрешна организација и човечки ресурси, јавни набавки и управување со средства, ова се областите кои биле детектирани како потенцијални  ризици за евентуална корупција во општина Ново Село. Со цел да ги препознае и намали таквите ризици  општината во соработка со  правниот факултет Јустинијан Први и фондацијата Конрад Аденауер подготвија студија и прирачник со конкретни мерки и активности. Градоначалникот на Ново Село вели дека се работи за важни документи кои треба да помогнат да се избегнат несаканите влијанија  и најави целосно спроведување на препораките содржани во прирачникот и студијата.

Од фондацијата Конрад Аденауер велат дека идеално решение за надминување на корупцијата не постои. Но она што го потенцираат како многу важно е креирањето на квалитетни закони и подигањето на свеста кај граѓаните кои треба да ја препознаат корупцијата.

Дел од процесот за препознавање на евентуалните ризици од корупција беа и серијата обуки низ кои поминаа сите вработени во општинската администрација на Ново Село. После една година во општината ќе биде спроведен мониторинг, неговите резултати треба да покажат дали и колку новите знаења биле применети и во пракса.