Комисијата за избори и именувања денеска предлогага нов член на ДКСК

Собраниската Комисија за прашања на изборите и именувањата денеска треба да го соопшти предлогот за нови членови на Државната комисија за спречување на корупцијата и на Државниот совет за превенција на детско престапништво и правда за деца, а на дневен ред на седницата се повеќе други точки. 

Прворангирана на листата за нов член на ДКСК со најмногу бодови, според документот објавен на веб страната на Собранието, е Катерина Зајковска со 90, 67 бодови, а Комисијата за селекција оценила дека врз основа на дадените одговори кандидатката има големо искуство во борбата за спречување на корупцијата и судирот на интереси и има јасна визија за работата на ДКСК и план за нејзината работа.

Дала одлични одговори за поставените општи и посебни прашања. Зад неа е Милка Муратовска, а зад неа се Тања Левајковиќ и Владимир Клековски.   

На огласот за избор на член на Државниот совет за превенција на детско престапништво и правда за деца се пријавени кандидатите Невена Петровска, Димитар Каракулев, Наташа Георгиева, Зоран Киткањ, Елена Георгиевска и Елена Мујоска Трпевска.

Ќе се менуваат и членовите на комисиите на барање на ЗНАМ, одлуката за основање на пратенички групи на Собранието на Република Северна Македонија за соработка со парламенти на други држави и избор на претседатели и членови на пратеничките групи на Собранието.

На дневен ред е и Предлог - одлука за разрешување и именување на претседател и членови на Одборот за доделување на државната награда „Мајка Тереза”, на Одборот за доделување на државната награда „22 Ноември” и на Одборот за доделување на државната награда „Св. Климент Охридски”.

МИА