Кривична пријава за Јани Макрадули, поранешен директор на „Пошта“, поради злоупотреба на позицијата

Управата за финансиска полиција поднела кривична пријава до Основното јавно обвинителство Скопје против Јани Макрадули, поранешен генерален директор и претседател на Управниот одбор на АД „Пошта на Северна Македонија“, поради постоење основи на сомнение за сторено кривично дело „Злоупотреба на службената положба и овластување“ од член 353 од Кривичниот законик.

Според соопштението на Управата за финансиска полиција, во периодот од 2021 до 2022 година, Макрадули не постапил согласно Статутот на друштвото и Законот за трговските друштва, бидејќи не ги реализирал одлуките и заклучоците на Управниот одбор за исплата на финансиските обврски кон два правни субјекта во вкупен износ од 19.292.984 денари.

Иако му била доставена потребната документација за извршување на плаќањата, тој не ја потпишал спогодбата за подмирување на долгот, не ги потврдил фактурите и не ги потпишал налозите за плаќање.

Поради неизвршувањето на овие обврски, против државното акционерско друштво биле поведени судски постапки, кои завршиле со пресуди со кои била утврдена обврска за исплата на казнена камата.

Во соопштението на Управата за финансиска полиција се наведува дека како последица на ваквото постапување, на АД „Пошта на Северна Македонија“ била предизвикана финансиска штета во износ од 10.968.483 денари по основ на казнена камата.