Крводарителска акција во чест на празникот Голема Богородица организира Црвениот крст

Крводарителска акција во чест на празникот Голема Богородица, под мотото „Твојата хуманост е нечија надеж“, организира денеска Црвениот крст на Република Северна Македонија – Општинска организација Центар во соработка со Институтот за трансфузиона медицина.

Акцијата ќе се одржи во Домот на АРМ од 09 до 17 часот.

Од Црвениот крст очекуваат да бидат донирани од 150 до 180 крвни единици и упатуваат апел до сите граѓани на возраст од 18 до 65 години кои се чувствуваат здраво да земат учество во крводарителската акција, да даруваат крв со една единствена цел да се помогне на сите на кои им е потребна.

На тој начин ќе дадат свој личен придонес за стабилно функционирање на здравствениот систем, ќе спасат човечки животи кои се доведени во кризна состојба предизвикана од болест, повреди, сообраќајни незгоди, ќе ја покажат својата солидарност, хуманост и општествена одговорност, наведуваат од Црвениот крст - Општинска организација Центар.

МИА