Mедицинските сестри можат да се вратат од приватно во јавно здравство

По примерот на специјалистите и медицинските сестри можат да се вратат од приватно во јавно здравство. Со најновите измени на законот за здравствена заштита истото се однесува и за техничарите  и радиолошките  технолози со средно, вишо и високо стручно образование.Целта според министерот за здравство е да се зголеми квалитетот на здравствените услуги бидејќи се работи за искусен и обучен среден медицински кадар.

- Услов за враќање на медицинските сестри, техничари и технолози е да имаат најмалку три години работно искуство во јавна здравствена установа или најмалку седум години во јавна или приватна здравствена установа која врши болничка дејност, изјави Никола Тодоров, министер за здравство.

Досега 30 медицински сестри поднеле барање да се вратат од приватни во јавните здравствени установи. 

-Ќе биде објавен оглас за изразување интерес на кој ќе бидат повикани да се пријават сите медицински сестри кои ги исполнуваат условите и кои сакаат да се вратат од приватното во јавното здравство. Очекувам да има голем интерес и уште повеќе да се зголеми квалитетот на здравствените услуги зашто се работи за подготвен, искусен, обучен кадар, истакна Тодоров. 

Претходните две години преку сличен проект над 200 специјалисти се вратија во јавното здравство. Станува збор за лекари од 20 различни специјалности во 18 градови.