Муцунски и Саар потпишаа два билатерални документи за унапредување на соработката меѓу Македонија и Израел

Министерот за надворешни работи и надворешна трговија Тимчо Муцунски, во рамки на посетата на Израел, оствари средба со својот израелски колега, министерот за надворешни работи Гидеон Саар, на која биле потврдени добрите билатерални односи и заедничката определба за нивно натамошно продлабочување.

Како што соопшти Министерството за надворешни работи и надворешна трговија, двајцата министри разговарале за можностите за унапредување на соработката во повеќе области од заемен интерес, со акцент на економијата, одбраната, сајбер-безбедноста, здравството, земјоделството и туризмот.

Според Муцунски, посетата претставува можност добрите политички односи меѓу двете земји да се преточат во поконкретна и подинамична соработка.

-Посетата е можност силните политички односи да ги преточиме во поконкретна соработка, особено во економијата, одбраната и одбранбената индустрија, сајбер-безбедноста, здравството, земјоделството и туризмот - истакнал Муцунски.

Во рамки на посетата биле потпишани и два билатерални документи - Програма за соработка во областа на образованието, науката, културата, младите и спортот за периодот 2026-2029 година и Меморандум за разбирање за билатерални економски консултации меѓу министерствата за надворешни работи на двете земји.

Од Министерството посочуваат дека со потпишувањето на документите дополнително се зајакнува институционалната рамка за соработка и се создаваат услови за продлабочување на партнерските односи во повеќе сфери.

Муцунски воедно изразил благодарност за солидарноста и поддршката што Израел и израелскиот народ ги покажале по трагедијата во Кочани.

Во разговорите била потврдена заемната подготвеност за натамошно надградување на партнерството преку конкретни проекти, интензивирање на економските врски и отворање нови можности за соработка од заемен интерес. 

МИА