„Најтажниот ден“ во годината

Тажниот „син“ трет понеделник во јануари вообичаено се смета за „најдепресивниот ден“ во годината… И, иако ова не се заснова на научни факти, сепак, денеска многумина чувствуваат емотивни тешкотии и предизвици, додека зимските температури сè уште се ниски, денот сè уште кус, а празниците се зад нас.

Овој ден, според познавачите, може да послужи за осознавање, признавање и решавање на чувството на тага коешто некои луѓе може да го искусат во зимските месеци. Така, главниот совет гласи: Работете на менталното здравје! „Тажниот понеделник“ е потсетник за грижата за себе. Можеби е време и за разговор со психолог, ако тоа е потребно.

Тезата за „тажниот син понеделник“ во 2004 година ја поставил Клиф Арнал – психолог од Велс кој предавал на Универзитетот во Кардиф. Своевидниот „гуру“ во својата теорија зел предвид неколку фактори, како што се временските услови, времето по Божиќ, парите и трошоците. Формулата гласи: [V + (D – d)] k TK / M k Na. Притоа, V означува време, D – долгови, d – месечна плата, T е за деновите минати од Божиќ досега, K – денот кога сме се откажале од новогодишните одлуки, M е нивото на мотивација и N е „параметарот“ за чувството дека треба да направиме нешто.

Така, неговиот прв совет гласи: Освежете ги Вашите цели и приоритети! „Тажниот понеделник“ може да биде прилика за повторно сосредоточување на целите и приоритетите за претстојнава година. Поставувањето нови цели или преразгледувањето и надградбата на веќе постоечките – може да создаде чувство на мотивација и цел.

Натаму, се вели, направете план за физичка активност! Телото и умот се поврзани, па и редовните вежби може да го подобрат расположението. Вклучете се во потфати коишто поттикнуваат благосостојба, ангажираност, чувство на полезност, среќа.

Поврзете се со семејството и пријателите! Денеска е совршен ден за дружење со саканите, да ги споделите Вашите чувства и да побарате поддршка, заради попријатни чувства, поведар дух и борба против лошото расположение.

Опуштете се! Не заборавајте на себеси и Вашите потреби. Опуштањето и занимациите коишто исполнуваат и носат радости, без разлика дали се работи за читање книга, гледање филм или медитација – сè тоа е пожелно и многу препорачливо.

Поставете си ги „дневните цели за среќа“! Наместо да се сосредоточите на еден ден, последниот совет на психологот гласи: Размислете за поставување дневни цели, за посреќни денови преку цела година. Ова помага да се одржи потребниот позитивен дух.