Нејмар успешно опериран

Бразилската фудбалска ѕвезда Нејмар го оперираше левото колено, соопшти денеска неговиот клуб Сантос.

Нејмар беше подложен на артроскопија за лекување на скинат медијален менискус.

„Операцијата беше успешна и играчот се опоравува добро“, се наведува во клупското соопштение.

Операцијата ја изврши лекарот на бразилската репрезентација Родриго Ласмар, кој и претходно го оперираше Нејмар.

Бразилецот наскоро ќе биде пуштен од болница и ќе почне со процесот на рехабилитација.

Се очекува Нејмар да ги пропушти претсезонските подготовки на Сантос, што ќр продолжат на 3 јануари.

Нејмар ја почна својата кариера во Сантос и се врати во клубот од детството во јануари оваа година. Тој постигна 11 голови на 28 настапи, играјќи клучна улога во обезбедувањето на прволигашкиот статус во бразилското првенство.

Неговиот договор истекува на крајот од годината, но раководството на клубот посочи дека ќе се обиде да го задржи.

Нејмар е најдобар стрелец на сите времиња на бразилската репрезентација со 79 голови, два повеќе од Пеле, но нема настап за националниот тим од 17 октомври 2023 година, кога го поведи коленото против Уругвај.

Новиот селектор на Бразил, Карло Анчелоти, кој седна на клупата во јуни годинава, сè уште не го повикал Нејмар во репрезентацијата.

МИА