Нетанјаху: ИДФ ќе останат во Либан колку што е потребно, ние ќе ја одржиме воздушната супериорност

Израелскиот премиер Бенјамин Нетанјаху денеска изјави дека израелските сили ќе останат во Либан „колку што е потребно“.

„Ќе останеме во безбедносната зона во јужен Либан колку што е потребно за да ја гарантираме безбедноста на нашите заедници на север“, рече Нетанјаху на церемонијата по повод завршувањето на обуката за пилотите на израелските воздухопловни сили, објави „Тајмс оф Израел“.

Либан бара Израел да го исполни своето ветување да се повлече од две „пилот-зони“ на југот од земјата и да ги предаде на либанската армија пред да се согласи да учествува во следната рунда директни разговори, закажани за следната недела во Рим, пренесува израелскиот портал.

Израелските сили сепак ќе одржуваат тампон зона во јужен Либан.

Зборувајќи за кампањата против Иран, Нетанјаху го повтори своето претходно ветување дека „со или без договор, Иран нема да има нуклеарно оружје“.

Тој истакна дека поддршката на американската армија значително ги зголемила воените капацитети на Израел.

Без директно да ја спомене одлуката, Нетанјаху се осврна на најавата на американскиот претседател Доналд Трамп дека има намера да продаде борбени авиони Ф-35 на Турција, членка на НАТО и еден од најгласните критичари на Израел.

„Војната не е завршена. Покрај старите предизвици, постојано се појавуваат и нови. Старите оски се уриваат, а нови се појавуваат. Се подготвуваме за секое сценарио. Знаеме едно: секогаш мора да бидеме посилни од нашите непријатели“, истакна тој.

Нетанјаху рече дека зачувувањето на израелската воздушна супериорност е основа на националната безбедносна доктрина на Израел.

„Подеднакво е важно да се одржи стабилноста на проблематичниот Блиски Исток“, рече Нетанјаху, повторувајќи ги аргументите што ги изнесе оваа недела против продажбата на авиони Ф-35 на Турција.

Турскиот претседател Реџеп Таип Ердоган вчера изјави дека разговарал за заедничка соработка во одбранбената индустрија со американскиот претседател Доналд Трамп и потврди дека оваа соработка се однесува на изградба на воени бродови, фрегати, подморници и корвети.

Зборувајќи на прес-конференција на крајот од самитот на НАТО во Анкара, Ердоган потврди дека САД „во голема мера ги укинале воените санкции против Турција“ и нагласи дека Трамп има позитивен став кон продажбата на американски борбени авиони Ф-35 на Турција.

Тој изрази надеж дека „светот ќе види дека САД го исполнуваат своето ветување“ и го отфрли противењето на Израел и Грција на договорот за испорака на американски борбени авиони Ф-35 на Турција