16 дена безуспешна потрага на 10 годишниот Петар во Мариово

16 дена нема ниту трага, ниту глас, од 10 годишниот Петар Џобески кој исчезна кај селото Врбско, во прилепско Мариово. Иако теренот се пребаруваше и на најнедостапните места каде би можело да биде 10 годишното дете, тоа не се пронајде. Спасувачки тимови во кои дел беше и Дарко Неданоски, изведоа и две крајно опасни акциии. Неданоски влезе во старите окна на фабриката „Партизанка“, длабоки 70-тина метри, каде постоеше опасност и за неговиот живот, бидејќи таму нема влезено никој повеќе од 40 години. A се трагаше и со чамец по течението на Црна река, во период кога таа има најголем водостој, но и во оваа крајно ризична акција не се пронајде Џобески.

„Во окната мораше да се носат боци за дишење бидејќи е штетно за нашето здравје и тело. Кога се спуштив долу наидов на 3 тунели, двата беа затрупани, а едниот водеше во понатамошниот правец. Го пребарав и него во тој дел, но за жал не најдов никакви траги. Другата акција беше пребарување во самата Црна река и за жал и таму немаше никакви траги и знаци“, истакна Дарко Неданоски, дел од спасувачкиот тим.

Во моментов најголем проблем во потрагата е снегот и лошите временски услови. Досега најмногу во потрагата е вклучена погранична полиција Старавина, подрачно одделение Витолиште.

„Сега треба да продолжиме да бараме во радиусот, се зголемува тој периметар околу селото. И секако во тие тешко пристапни места бидејќи станува збор за големи хектари со густа шума, тешко пристапна шума за движење“, додаде Неданоски.

Но познавачите од теренот и експертите за ваквии ситуации, кои не сакааат да зборуваат јавно велат дека акцијата се води без поголема координација помеѓу институциите, за жал нема потрага по Петар секој ден или и да има таа е со многу мал број на луѓе. Само одвреме-навреме има акции со повеќе учесници. А најголемата грешка била што кога исчезна Џобески не се постави кризен штаб во селото и теренот не се пребаруваше 24/7, минимум една недела според некои протоколи. Дури имало и денови кога во селото и куќата на Џобески воопшто и немало луѓе.