Полицаец застрела мигрант во Гевгелија

Мигрантка била смртно застрелана откако криумчари нападнале полициски службеници кои вршеле контрола на возила во близина на касарната во Гевгелија. Немилиот настан се случил рано утрово откако полицијата запрела  две патнички возила за кои постоел сомнеж дека нелегално превезуваат мигранти. По запирањето и возачите и мигрантите почнале да бегаат,а еден од возачите и физички го нападнал полицискиот службеник обидувајќи се да му го одземе пиштолот. Во тој момент полицаецот испукал и погодил еден од мигрантите.

Околу 06.20 часот кај Касарна Гевгелија од страна на полициски службеници биле забележани патничко моторно возило „мерцедес“,управувано од К. Ј. (26) и патничко моторно возило „форд фокус“, управувано од С.Б. (51), двајцата од Скопје, во кои илегално се превезувале мигранти. Возилата биле запрени од страна на полициски службеници, по што возачите и мигрантите се обиделе да избегаат, а при тоа К.Ј. физички нападнал полициски службеник, обидувајќи се да му го одземе пиштолот. Притоа, полицискиот службеник испукал од службениот пиштол и погодил еден од мигрантите, кој веднаш бил пренесен со полициско возило во објектот на Итна медицинска помош за укажување лекарска помош, каде починал“ информираа од МВР.

И покрај обидите за реанимација лекарите од гевгелиската болница не успеале да ја вратат мигрантката во живот бидејќи како што соопштија од болницата таа кај нив била донесена без знаци на живот.

Двајцата возачи се приведени, а осум лица мигранти фатени. Во расчистувањето на случајот се вклучени јавен обвинител  од гевгелиското јавно обвинителство и одделот за внатрешна контрола, криминалистички истраги и професионални стандарди. По целосното расчистување ќе бидат поднесени соодветни поднесоци.