Селекцијата на отпад дава резултати во Струмица

Струмица и официјално започна со селекција на пластичен отпад и лименки. За околу еден месец граѓаните собрале близу еден тон пластика и 200 килограми лименки. Во првата фаза отпадот го селектираат 1200 домаќинства. Сите тие  претходно добија бесплатни канти само за таа намена. Од јавното комунално претпријатие Комуналец велат дека собраната количина ја потврдила високата еколошка свест на граѓаните и најавуваат дека до крајот на годината  бесплатни канти за селекција ќе добијат сите домаќинства во градот, а потоа и населените места.

После распределбата на втората канта, во следна фаза е поставувањето на 260 контејнери за селекција на пластика пред станбените згради.Селекцијата на пластичниот отпад треба да придонесе за намалување на вкупната количина на отпад во регионот, но и за помалку пожари во депониите кои токму  поради пластиката гореа со денови.

Вкупниот дневен отпад што се собира во општина Струмица изнесува околу 250 метри кубни. Со селекцијата таа количина се очекува да биде значително намалена.