Температурните осцилации ќе ја намалат годинашната реколта на ориз

Задоцнетата сеидба на одредени површини, големата осцилација на дневните и ноќните температури ќе ја намалат годинашната реколта на ориз за околу 30 %. Очекуваните 160 сончеви денови потребни за периодот на вегетација годинава ги немаше, што ќе влијае и на квалитетот и на квантитетот на родот.

-На самите кластови сега имаме бели зрна, кои се резултат на ниските температури кои ги имаме во вечерните часови. Не е болест, туку е од високи дневни темепратури на вечерни ниски и тогаш самото зрно не може да се оплоди, останува празно, шупливо, ние велиме, нема род, останува празно. Еден ваков клас треба да има од 150 до 180 зрна, се плашиме дека можеме да дојдеме до 100, изјави Тони Максимов, оризопроизводител од с. Облешево, Национална мрежа на земјоделци.

По најавата на ресорното Министерство дека годинава ќе се откупува оризова арпа за потребите на стоковите резерви и тоа во вкупна количина од 2400 тони, оризопроизводителите побараа фелсибилност во условите за откуп, зашто оризопроизвиодителите обработуваат површини кои поради нерегулирани имотно правни оодноси не можат да бидат пријавени.

-Работат имот на дедо, прадедо, на починат татко, така што таму исто имаме производство, се плаќа воден надоместок на тие површини, меѓутоа бидејќи не се регистрирани во Министерството за земјоделие, на тие површини не можеме да пријавиме производство кое е предвидено да биде 800 килограми по декар. Затоа се јавува вишок на производ кај одредени земјоделци кои имаат поголемо производство, бидејќи тие површини не можат да ги пријават, а ги обработуваат и произведуваат храна, додаде Максимов

Годинава под „бело злато“ во Кочанско се посеани околу 4500 ха, а од минатогодишната реколта во амбарите стои над 6000 тони оризова арпа.