Од денеска само полнолетни смеат да возат електрични тротинети, забрането превезување и второ лице

Од денеска официјално почнуваат да важат измените на Законот за безбедност на сообраќајот на патиштата, со кои се воведуваат построги правила за користење на електричните тротинети.

Според новите законски решенија, електричен тротинет ќе смее да управува само лице кое има наполнето 18 години, наместо досегашната старосна граница од 14 години. На велосипедските патеки и ленти максималната дозволена брзина е 20 километри на час, додека на тротоари, пешачки и мешани патеки останува ограничувањето од 6 километри на час.

Возачите на електрични тротинети, при преминување преку коловоз или пешачки премин, доколку нема велосипедска патека или лента, ќе мора да се симнат од тротинетот и да го туркаат. Дополнително, со измените се забранува превезување на друго лице, а во случај на прекршување на ова правило ќе бидат казнети и возачот и патникот.

Носењето заштитен шлем отсега е задолжително за сите возачи, а и понатаму останува обврската за користење рефлектирачки елек при ноќно возење или во услови на намалена видливост.

Законот предвидува и построги санкции. Освен парични казни, за одредени прекршоци ќе следува и привремено одземање на електричниот тротинет во период од 30 дена. Доколку прекршок направи дете, одговорноста ќе ја сносат неговите родители или старатели.