Од утре почнува да сообраќа „Градскиот воз“ на релацијата Зелениково-Скопје

Официјалната промоција на проектот „Градски воз“ ќе се одржи во среда, 2 септември, најавија од Министерството за транспорт. Градскиот воз утре ќе започне да сообраќа на првата од трите предвидени линии и тоа: Зелениково - Ново Зелениково - Орешани - Јане Сандански - Драчево - Лисиче и Нова железничка станица Скопје.    

На настанот се очекува да присуствуваат претседателот на Владата, Христијан Мицкоски, заменик претседателот на Владата и министер за транспорт Александар Николоски, директорoт на ЈП МЖ Инфраструктура Синиша Ивановски, директорот на  МЖ Транспорт Дејан Кошутиќ, потоа градоначалникот на Град Скопје Орце Ѓеоргиевски, како и градоначалниците на оштините Зелениково, Коста Маневски, на Кисела Вода, Бети Стаменкоска Трајкоска и на Аеродром, Дејан Митевски.  

Според предвиденото, присутните симболично ќе го означат проектот „Градски воз” со патување со воз од железничката станица Зелениково до Нова железничка станица Скопје.

Железници Инфраструктура за потребите на проектот „Градски воз” изврши целосна реконструкција на пругата за да го подигне нивото и капацитетот на брзина на оваа релација.

Сообраќајот на линијата Зелениково-Нова железничка станица Скопје ќе се реализира со три возови според точно утврден ред на возење кој го утврди МЖ Транспорт. 

Проектот „Градски воз” е идеја на оваа Влада со цел граѓаните на Скопје како од приградските места, така и од централниот дел да добијат побрз, поефикасен и подостапен јавен градски превоз. Целта е периферните делови на Скопје да се поврзат со централното подрачје на Градот, што ќе значи поевтино патување, пократко патување, помалку чекање и побрз јавен транспорт.

Особено значајно е што проектот „Градски воз" се интегрира и со сообраќајниот ред на возење на ЈСП и на тој начин се добива еден квалитетен, интегриран и ефикасен јавен превоз за граѓаните, студентите и учениците. 

Од Министерството за транспорт потенцираат дека во тек се работи и на проектирање на втората и третата линија од Градски воз, односно едната од Нова железничка станица преку Бутел - Скопје-Север до Ѓорче Петров и другата од Нова железничка станица преку Автокоманда- Маџари до Илинден. 

МИА