Охридското Езеро најубаво во Европа – пред Комо, делото на Гауди и норвешките фјордови според „Time Out“

Охридското Езеро е прогласено за најубаво место во Европа според листата на познатиот туристички магазин „Time Out“ за 2026 година.

Охридското Езеро се најде на првото место на изборот на патописците и туристичките автори на магазинот, пред низа познати природни и културни знаменитости од целиот континент.

„Time Out“ го опишува Охридското Езеро како едно од најстарите и најдлабоките езера во Европа, со сина вода, планински пејзажи и крајбрежје исполнето со историски населби.

Посебно е издвоен македонскиот дел од езерото и градот Охрид, со неговите калдрмисани улици, средновековни цркви и препознатливите покриви кои се спуштаат кон езерото. Како една од највпечатливите глетки се посочува црквата „Св. Јован Канео“ и погледот кон Охридското Езеро.

Магазинот го споредува Охридското Езеро и со познатото италијанско езеро Комо, наведувајќи дека Охрид нуди помирна и попристапна алтернатива, со прекрасни пејзажи, но без големите туристички гужви и високите цени карактеристични за Ломбардија.

На второто место на листата се термалните извори Сатурнија во Тоскана, а трет е Џиновскиот насип во Северна Ирска. Следуваат Алберобело во Италија и Почитељ во Босна и Херцеговина.

Норвешките фјордови се на шестото место, Кју Гарденс во Лондон на седмото, каналот Принсенграхт во Амстердам на осмото, долината Мозел во Германија на деветтото, додека Каса Батљо во Барселона, ремек-делото на Антони Гауди, го зазема десеттото место.