„Октоберфест“ почна со инцидент: Посетители виселе со главите надолу поради дефект на реквизит

Посетителите на еден од забавните реквизити на Октоберфест во Минхен останале да висат со главите надолу неколку минути, синоќа на првиот ден од познатиот фестивал на пивото, соопшти минхенската служба за брза помош.

По инцидентот, неколку лица – главно помлади посетители – се пожалиле на блага вртоглавица и проблеми со циркулацијата.

Портпарол на противпожарната служба задолжена за фестивалот изјави дека технички дефект предизвикал запирање на ротирачки забавен реквизит (рингишпил).

Според противпожарната служба, стручно лице го прегледало реквизитот и одобрило негово повторно користење уште истата вечер.

Од службата за брза помош соопштија дека згрижиле речиси 600 пациенти за време на првиот ден од 191-то издание на „Октоберфест“.

Фестивалот, локално познат како „Визн“ (Wiesn), беше отворен вчера, а првите гости чекаа уште од раните утрински часови за да заземат подобри места во шаторите за пиво.

Најголемиот фестивал на пивото во светот трае 16 дена, до 4 октомври, а вклучува шатори за пиво, панаѓурски атракции, традиционална баварска храна и музика во живо.

МИА