Почнуваат активностите за третата фаза од пругата кон Бугарија

Наскоро почнуваат активностите за изградба на третата делница од пругата кон Бугарија. Станува збор за делот од Крива Паланка до бугарската граница, долг околу 23 километри. На него се планирани 22 тунели, вклучувајќи и меѓуграничен, и 52 моста. Владата на седница пред три дена донела одлука да се активира грант од Европската инвестициска банка тежок 3,7 милиони евра за техничка поддршка. Премиерот Мицкоски вели дека оваа фаза е многу важна за Македонија бидејќи со неа ќе се заокружи целата делница што е дел од Коридор 8.

„Третата фаза е во процес на развивање, битно е дека сите пречки од минатото што се случуваа се надминати, постигната е согласност со нашиот источен сосед. Нашиот дел, би рекол со одлуката на Владата да се активира грантот што значи техничка поддршка од страна на Европската инвестициска банка значи дека и ние почнуваме со овој проект. Техничката поддршка значи ревизија на основниот проект, ревизија на целосната документација и потоа објавување јавен повик за изградба на третата фаза“ – Христијан Мицкоски, премиер 

Со тендерот што пропадна, како што објави Владата, вредноста од првично планираните 340 милиони евра била зголемена на 560 милиони евра. Првиот дел од пругата е веќе завршен, а вториот е 30% готов. Паралелно се подобрува и патната инфраструктура кон источниот сосед. Денеска почнува реконструкција на обиколницата Крива Паланка, а увид во градежните работи направија Мицкоски, Николоски и Трајановски. 

„Со рехабилитацијата на обиколницата, оние кои што патуваат кон Софија, Бугарија исто така побрзо и побезбедно ќе може да патуваат. Во таа насока би сакал да спомнам дека активно се работи на реконструкција и на Граничниот премин, активност која што ја започнавме минатата година и активност која има добра динамика и која очекувам да биде завршена набрзо и да има поголем проток на границата“ – Александар Николоски, вицепремиер и министер за транспорт

Ќе се врши санација на асфалтот, а таму каде што е многу оштетен, ќе се извади и ќе се стави нов. 

„Проектот опфаќа рехабилитација на два моста, шест пропусти и еден подземен премин. Го распишавме тендерот и се работи, во надлежност на ЈПДП е коловозот со ивичници, додека тротоарите, осветлувањето и подземната инсталација се во надлежност на општината“ – Коце Трајановски, директор на ЈП Државни патишта

Проектот е вреден околу еден милион евра.