Порака од Холандија, за вас нема влез во ЕУ без владеење на правото

Холандскиот амбасадор кој постојано ја критикува земјава за широко распространетата корупција, денеска со нова порака – за вас нема членство во ЕУ без владеење на правото. Прв ваквата порака ја слушна лидерот на ДУИ, Али Ахмети кој денеска на гости го имал амбасадорот. Јан Коп го предупредил Ахмети и за политичките притисоци со кои се соочува претседтелот на Врховниот суд.

Дека ова било централна тема на средбата, лично информираше холандскиот амбасадор, а пораката што ја слушнал лидерот на ДУИ е споделена и јавно.

„Амбасадорот на Холандија во Македонија, Дирк Јан Коп се сретна со лидерот на ДУИ Али Ахмети за да ја пренесе пораката дека по две години постојан пад на владеењето на правото, посветеноста на Македонија за членство во ЕУ е загрозена низ политичкиот спектар. Исто така, неприфатливо е несоодветно политичко влијание врз позицијата на претседателот на Врховниот суд, што е судска работа и ќе предизвика силна реакција од Холандија“.

Ваквата порака доаѓа во време кога Судскиот совет треба да одлучи дали ќе ја разреши претседателката на Врховниот суд зашто јавно се пожалила на политчки притисоци. На последниот работен ден од минатата година Беса Адеми лично слушна зошто е соочена со разрешување. Официјално дека не доаѓала на седница, неофицијално зашто кажала дека Врховниот суд е под политички притисок да дозволи примена на аболицијата на поранешниот претседател Иванов.

Холандскиот амбасадор беше меѓу првите кои го осуди начинот на разрешување на претседателката на Судски, а советот го нарече нелегитимно тело. Уште во мај лани, Јан Коп рече дека има лош развој на случувањата во правосудството, па непосредно по пучот во судски, Холандија замрзна милионски проект со кој требаше да се унапредува работата на телото кое ги следи состојбите во правосудниот систем.