Претседателот на иранскиот парламент го обвини Трамп дека „слепо ги следи наредбите“ на Нетанјаху

Претседателот на иранскиот парламент, Мохамед Багер Галибаф, го обвини американскиот претседател Доналд Трамп дека „слепо ги следи наредбите“ на израелскиот премиер Бенјамин Нетанјаху, предупредувајќи дека целиот регион може да биде вовлечен во поширок конфликт.

Во објава на социјалните мрежи Галибаф истакна дека, како што рече, непромислените потези на Вашингтон ги туркаат САД кон сериозна криза, со потенцијално тешки последици за регионот.

„Целиот наш регион ќе гори доколку продолжите со оваа политика“, наведе тој, алудирајќи на американската поддршка на Израел.

Иранскиот функционер додаде дека единствено решение е почитување на правата на иранскиот народ и прекин на, како што ја нарече, „опасната воена игра“.

Тензиите се зголемија откако САД и Израел на 28 февруари започнаа напади врз Иран, што дополнително ја влоши безбедносната состојба на Блискиот Исток.